آخر الأخبار

الإدارة الخطأ في البلد الصح | مجلة السياحة العربية

Untitled144444

بقلم – رامي فايز

مش قادر أقولك إحنا بنعاني قد إيه علشان نجيب سائح واحد بس لمصر .. وبنعاني قد إيه علشان ينبسط رغم كمية السلبيات المخيفة في بلدنا وبنعاني قد إيه علشان نعرف ناخد فلوسنا من الشركات الأجنبية اللي مبتدفعش غير بعد ٣ شهور علي الأقل وده علي أحسن تقدير … وبنعاني قد إيه علشان تفتح وجهات هيا أصلا مقفولة زي شرم الشيخ قصاد السياحة الإنجليزية والروسية وأصبحت فندقيا وتسويقيا مستواها أقل بكثير مما عاهدناها عليه وده شئ طبيعي طبقا لنظرية العرض والطلب .. وبنعاني قد إيه علشان تقنع اتحاد شركات السياحة الروسية أنها تضغط علي الحكومة الروسية لفتح الطيران الشارتر للسواحل المصرية لأن ده في النهاية أصبح قرارا روسيا سياسيا بحتا والحكومة المصرية بعيدة كل البعد عن نظرية المكاسب والمصالح المشتركة بينها وبين الروس وأصبحنا في انتظار المنحة الروسية التي قد لا تأتي في القريب العاجل …للدرجة دي إحنا بقينا ضعاف وخايفين من شركة إنجليزية وحيدة أنها تتلاعب بسياحة دولة كبيرة زي مصر وتلوح من بعيد بإلغاء مصر كمقصد سياحي لمجرد الاشتباه في وفاة وقبل حتي انتظار نتائج التحقيقات !! يعني إيه عندنا وزارة سياحة فيها آلاف الموظفين وهيئة تنشيط سياحة فيها آلاف الموظفين وغرف شركات وغرف للفنادق واتحاد للغرف السياحية وتبقي هيا دية النتيجة في 2018!!

لازم نبتدي نواجه نفسنا بأننا مش ضعاف وإننا أصحاب واحد من أقوي المنتجات السياحية المتنوعة في العالم والمتواجدة في بلد واحد لكن واحنا بنواجه نفسنا لازم نصارح بعض بأننا بنهد مستقبل قطاع السياحة المصرية بأسلوبنا في إدارته والعفوية في اتخاذ القرارات غير المدروسة مسبقا وافتقار فن إدارة الأزمات المتعاقبة عليه مما أدي لأن تكون مصر تاني أرخص مقصد سياحي في العالم بالإضافة للمحاولات المتكررة مرارا وتكرارا والالحاح بتحسين صورة مصر في السياحة الدولية لدرجة أن الشركات العالمية بدأت تعي أن الخلل من الداخل المصري وليس من الخارج …يعني إيه تفضل تنزل صور لأماكن مش نضيفة في بلدك أو سلوكيات غلط البعض منها ممكن يكون بيعملها نتيجة تدني مستواه التعليمي أو الحياتي وتتداولها علي مواقع التواصل الاجتماعي وبالتالي الشركات الأجنبية تبتدي تضحك عليك وتمسكك من إيدك الموجوعة (بذمتك انت شفت واحد أجنبي بيعمل كده في بلده !!!) …. صدقوني إحنا كلنا بنشتغل بالاجتهادات وعايشين اليوم بيومه ولا في خطة قصيرة المدي ولا حتي بعيدة المدي وربنا اللي ساترها معانا علشان خاطر بس الناس الغلابة اللي بتشتغل وبتاكل عيش من قطاع السياحة ..

مصر بلدنا أقوي وأكبر وأحسن من اننا نتعامل معاها بالأسلوب ده ….صدقوني احنا بنتحارب من جوه قبل مانكون بنتحارب من بره .

 

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *

Powered by www.worldforhost.net